ПОРАНЕШЕН ПРЕТСЕДАТЕЛ НА РЕПУБЛИКА МАКЕДОНИЈА Д-Р ЃОРГЕ ИВАНОВ

Школа за млади лидери

@IvanovSchoolForYoungLeaders
@islaa.mk
@FoundationAllianceofCivilizations

Кабинетот на поранешниот Претседател на Република Македонија 2009-2019, проф. д-р Ѓорге Иванов, информира дека на 27.11.2021 година се одржа свеченото затворање на 12-тата Меѓународна обука за млади лидери на Претседателот Иванов во хотелот Инекс Олгица во Охрид.

Дванаесеттата Школа за млади лидери на Претседателот Иванов, на тема „Лидерство во акција“, се одржа во периодот 12-27 ноември 2021 година во комбинирано издание, онлајн и со две сесии со присуство во живо, едната во Скопје и втората сесија на свечено затворање во Охрид. Школата успешно ја завршија 36 учесници кои имаа можност да следат предавања на дваесетина предавачи од Македонија и од странство.

Претседателот Иванов ја затвори 12-та Школа за млади лидери на темата „Лидерство во акција“. На сесијата на свечено затворање, покрај Претседателот Иванов се обрати и Градоначалникот на Општина Охрид, г. Кирил Пецаков. Претседателот Иванов на учесниците кои ја следеа целата програма и успешно ја завршија школата им додели сертификати. Воедно, на поддржувачите и ко-организаторите им додели благодарници.

Во текот на 12-тата Школа за млади лидери предавања за учесниците одржаа: Претседателот на Република Србија, Александар Вучиќ, Министерот за надворешни работи на Република Турција, г. Мевлут Чавушоглу, Сани Шенер, главен извршен директор и Претседател на „ТАВ аеродроми“; Рза Алијев, Менаџер за развој и имплементација на политики, стратегија и одржливост во компанијата Бритиш Петролеум и член на Бордот на World Monuments Fund; Рашела Мизрахи, пратеник во Собранието на Република Македонија; Ендру Пејкоф, Претседавач на компанијата Niagara Bottling LLC; Јордан Битов, Ко-сопственик и издавач, Torstar Corporation, и основач и ко-сопственик на Nordstar Corporation; Елизабет Наумовски, Заменик претседател за маркетинг во компанијата Caldwell Securities Ltd. и добитник на повеќе награди како застапник за финансиска писменост; Џери Наумоф, Претседавач на Бордот на компанијата Taskforce; Методија Колоски, Ко-основач и Претседател на Обединета Македонска дијаспора; Зоран Костовски, Директор на компанијата за деловна едукација, менаџмент консалтинг, образование и обука „Мотива“; Хозе Антонио Моралес, Извршен директор на компанијата Lincoln Iceland Company LLC; Гордица Каранфиловска, поранешен координатор на проектот Школа за млади лидери. Предавање за учесниците одржаа и поранешните учесници на школата и членови на ИСЛАА, Ѓорѓе Божинов, Градоначалник на Општина Ново Село; Александар Митов, експерт за јавно здравје; Катерина Велјановска Блажевска, професор и експерт за јавни политики и комуникација, Катерина Климовска, Претседател на алумни асоцијацијата ИСЛАА. Модератор на сите сесии на Школата беше Даниел Ѓоќески, поранешен учесник на школата и координатор на проектот Школа за млади лидери.

Школата за млади лидери е иницијатива на претседателот Ѓорге Иванов која започна на почетокот на неговиот прв мандат. Првата Меѓународна обука за млади лидери се одржа во 2010 година. Оттогаш, во текот на досегашните 12 обуки, учествуваа околу 476 млади луѓе од земјата и од странство, со различен академски и професионален фокус. Пред дванаесетте генерации учесници на Школата за млади лидери, предавања одржаа над 240 реномирани предавачи од Република Македонија, Европа и светот. Во 2018 година, проектот Школа за млади лидери на Претседателот Иванов, е прогласен за најдобар социјално одговорен проект во Европа за 2017 година од страна на Светскиот инвестициски форум на бизнис ангели.

@IvanovSchoolForYoungLeaders
@islaa.mk
@FoundationAllianceofCivilizations

Ова попладне се одржа последната онлајн сесија на 12-та Меѓународна обука за млади лидери на Претседателот Иванов. Предавањето кое учесниците го слушаа беше одржано од страна на Хозе Антонио Моралес, главен извршен директор на компанијата Lincoln Iceland LLC и основач на Lincoln Iceland Initiatives.

Г. Моралес, кој за себе вели дека е социјален претприемач, социјален иноватор, им го раскажа патот од идеја, концепт, рамка на делување и развој на неговата иницијатива Остров Линколн. Сподели совети со младите учесници дека мора да планираат, да имаат добро поставени цели, да се идентификуваат, да работат на себе откривање и да ги прифатат своите верувања и да работат на својот развој и постојано да се адаптираат на новите ситуации и прилагодат на промените кои се неминовни. Истакна дека мора да работат на себе, и лично и професионално. Зборуваше како младите лидери треба да се изборат со своите несигурности, да бидат подготвени да жртвуваат нешто за да ја постигнат својата цел. Им порача дека мора да бидат свои, да бидат тоа што се, да не градат ѕидови околу себе, да се соочуваат со проблемите, да ги препознаат и надминат своите стравови, да бидат автентични, да бидат храбри, да ја прифаќаат одговорноста.

- УСПЕШЕН ДЕН 13 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

- УСПЕШЕН ДЕН 13 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

@IvanovSchoolForYoungLeaders
@islaa.mk
@FoundationAllianceofCivilizations

Младите учесници на 12-та Меѓународна обука за млади лидери на Претседателот Иванов вечерва ги презентираa своите размислувања на општата тема на школата „Лидерство во акција“ и споделуваа примери и нивни ставови за тоа како тие го препознаваат вистинското и успешно лидерство во пост Ковид19 период. Учесниците имаа прилика да направат презентација во форма и содржина која најблиску и најсоодветно го отсликува нивното размислување на темата.

- УСПЕШЕН ДЕН 12 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

- УСПЕШЕН ДЕН 12 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

@IvanovSchoolForYoungLeaders
@islaa.mk
@FoundationAllianceofCivilizations

Денешната единаесетта сесија на 12-та Меѓународна обука за млади лидери на Претседателот Иванов се одржа повторно онлајн, и беше продолжение на сесијата на дијалози, чиј што прв дел се одржа минатата недела.

Учесниците имаа прилика да продолжат да работат во групи и да ги презентираат своите идејни решенија за тоа како да им помогнат на младите да ги надминат предизвиците од Ковид19 пандемијата. Воедно, се стекнаа со искуство на примена на дигитални вештини во виртуелна средина, како тимска работа, презентирање и споделување на повратни информации и коментари.

- УСПЕШЕН ДЕН 11 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

- УСПЕШЕН ДЕН 11 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

@IvanovSchoolForYoungLeaders
@islaa.mk
@FoundationAllianceofCivilizations

Меѓународната обука за млади лидери на Претседателот Иванов попладнево ја одржа десеттата сесија. Сесијата се одржа онлајн, а предавањето кое имаа прилика да го следат младите учесници на школата беше одржано од страна на г. Методија Колоски, ко-основач и претседател на организацијата Обединета македонска дијаспора (ОМД).

Г. Мето Колоски раскажа за почетоците на непрофитната и невладина организација Обединета македонска дијаспора, како идејата станала стварност, како се развивала, како се зголемувала мрежата, како се внесувале нови содржини и нови активности и кои се резултатите гледани од денешна перспектива. Колоски сподели со младите учесници информации за актуелните проекти со македонската дијаспора, за работењето на македонската кауза, за работата на политички и економски прашања, културни и социјални проекти, за нивните хуманитарни акции. Истакна дека за време на ковид кризата и за пост ковид периодот како организација имале проекти и донации за поддршка на здравството во Република Македонија. Покрај г. Колоски, на сесијата се обрати и г. Филип Јотевски од ОМД кој е алумни на Школата за млади лидери на Претседателот Иванов и кој раскажа за проектот Generation M, Brightright Macedonia, раскажа за своето искуство во ОМД и неговото учество во активностите и акциите на ОМД.

Претседателот на ОМД Колоски истакна дека главната улога на македонската дијаспора ја препознава во работењето и вложувањето во претставување и промоција на Македонија, да не се заборава, но и да се негуваат македонските корени и традиција, да се шири мрежата на Македонците во светот.

- УСПЕШЕН ДЕН 10 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

- УСПЕШЕН ДЕН 10 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

@IvanovSchoolForYoungLeaders
@islaa.mk
@FoundationAllianceofCivilizations

На деветтиот ден од 12-та Меѓународна обука за млади лидери на Претседателот Иванов, предавања за учесниците одржаа г. Џери Наумоф, Претседавач на Бордот на компанијата Taskforce, и г-ѓа Рашела Мизрахи, пратеник во Собранието на Република Македонија.

Џери Наумоф сподели корисни совети со учесниците, раскажа за неговиот приватен живот, за неговиот професионален развој, водењето бизнис во САД, отворањето и прогресот на компанијата Taskforce, предизвиците за време на почетокот на ковид пандемијата, како и за неговиот ангажман како поранешен министер за привлекување на странски инвестиции на Република Македонија. Неговиот совет за младите учесници беше да инвестираат во своето образование, да ја наградуваат својата самодоверба, да бидат храбри и да преземаат иницијативи. Посебно го истакна значењето на добриот тим и на тимската работа.

Рашела Мизрахи своето предавање за учесниците на 12-та Школа за млади лидери ја посвети на нејзината борба за Македонија, добрата борба за Македонија. Нагласи дека Македонија за Македонците е емоција. Сподели дел од нејзиното искуство во политиката во Република Македонија, предизвиците со кои се соочува. Според неа, најважно е секогаш да бидете опкружени со добри луѓе и добар тим. На учесниците им порача да се борат за вистината, да се соочуваат со стравот, да не се плашат да згрешат, да веруваат во себе, да имаат надеж, да имаат надеж за промени, никогаш да не се откажуваат. Зборуваше за нејзиното искуство и општо за учеството на жените во политиката.

- УСПЕШЕН ДЕН 9 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

- УСПЕШЕН ДЕН 9 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

@IvanovSchoolForYoungLeaders
@islaa.mk
@FoundationAllianceofCivilizations

12-та Меѓународна обука за млади лидери оваа година се одржува во комбинирано, онлајн и во живо. Денес беше првата сесија во живо на учесниците на школата на Претседателот Иванов која се одржа во хотелот DoubleTree by Hilton.

Предавање одржаа д-р Сани Шенер, главен извршен директор и претседател на Бордот на директори на ТАВ Аеродроми. Д-р Шенер им зборуваше на учесниците и им пренесе дел од неговото животно и богато професионално искуство на високи менаџерски позиции.

Денес учесниците на 12-тата Школа за млади лидери на Претседателот Иванов ја следеа и обуката за лидерски вештини која ја спроведе Центарот за менаџмент консалтинг, едукација и тренинг центар Мотива и директорот г. Зоран Костовски.

Младите учесници беа импресионирани од пораките на денешните предавачи, од нивната посветеност и подготвеност да го пренесат нивното знаење и искуство, како и од можноста да ги слушнат нивните совети и препораки за успешна кариера и развивање на лидерски вештини кои ќе им користат и професионален развој но и во нивниот приватен и социјален живот.

- УСПЕШЕН ДЕН 8 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

- УСПЕШЕН ДЕН 8 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

@IvanovSchoolForYoungLeaders
@islaa.mk
@FoundationAllianceofCivilizations

Учесниците на 12-та Меѓународна обука за млади лидери на Претседателот Иванов денес имаа можност да го проследат предавањето на повеќекратната добитничка на награди како поборник на финансиската писменост, г-ѓа Елизабет Наумовски, заменик претседател за маркетинг во компанијата Caldwell Securities Ltd.

Г-ѓа Наумовски своето предавање го подели до два дела. Првиот дел беа искуства, совети, препораки од позиција на нејзината професионална ангажираност во рамките на компанијата Caldwell Securities Ltd., за процесот на одлучување, со интересни информации за нејзиното напредување на професионален план. Вториот дел од предавањето беше за нејзината работа на полето на финансиската писменост. Таа сподели многу корисни совети со учесниците, одговараше нивните бројни прашања, раскажуваше примери и корисни и интересни податоци.

Нејзините пораки до младите учесници беа да бидат храбри, да преземаат чекори, да се обидуваат и да не се плашат да направат промени, ако паднат да научат, ако згрешат да се исправат. Како лидери да бидат транспаренти, да не се обидуваат да знаат сѐ, туку доволно, да се водат според вредностите и етиката, да ги почитуваат сите прописи.

- УСПЕШЕН ДЕН 7 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

- УСПЕШЕН ДЕН 7 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

@IvanovSchoolForYoungLeaders
@islaa.mk
@FoundationAllianceofCivilizations

Денешното предавање на учесниците на 12-та Меѓународна обука за млади лидери на Претседателот Иванов го одржа г. Јордан Битов, ко-сопственик и издавач на Torstar Corporation и основач и ко-сопственик на Nordstar Corporation.

Битов зборуваше дека е горд на своето потекло, дека ја сака Македонија и Македонците, дека е горд на својот татко и на неговите заложби за постигнување на независноста на Македонија. Смета дека да се биде Македонец е гордост и предност. Посочи дека обожува да работи за Македонија и секогаш се труди Македонија да биде прикажана во најдобро светло во канадските медиуми. Раскажа за развивањето на неговата компанија, за вложувањето во новите медиуми, за креативните решенија за пристап до повеќе претплатници и до помладите генерации. Сподели многу корисни совети со учесниците, да веруваат во себе и да се трудат да го постигнат тоа што го посакуваат.

- УСПЕШЕН ДЕН 6 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

- УСПЕШЕН ДЕН 6 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

@IvanovSchoolForYoungLeaders
@islaa.mk
@FoundationAllianceofCivilizations

Денес, во рамките на целата програма што ја имаат учесниците на 12-та Школа за млади лидери на Претседателот Иванов, се одржа сесијата на дијалози предводена од г-ѓа Гордица Каранфиловска, поранешен координатор на Меѓународната обука за млади лидери, во периодот од 2010-2015, и г. Даниел Ѓоќески, поранешен координатор на Меѓународната обука за млади лидери, во периодот од 2018-2019, кој воедно е и модератор на школата.

Сесијата на дијалози, која освен денес, ќе продолжи и следната недела, преставува можност учесниците да ги презентираат своите видувања и размислувања на општата тема на школата „Лидерство во акција“, како и на темата за влијанието на пандемијата на Ковид19 на условите и предизвиците за младите луѓе, како и нивни видувања на тоа какви и кои можат да бидат можните решенија. Учесниците ќе работат во рамките на двете сесии во групи за свои предлог решенија и истите ќе ги презентираат.

На почетокот на сесијата, на учесниците им се обрати г-ѓа Каранфиловска која зборуваше за нејзиното искуство при почетокот и првите години на школата, како идејата на Претседателот Иванов се имплементираше во реалност, а потоа и за развојот на школата, кои биле предизвиците и какви препораки може да сподели од нејзиното искуство. Раскажуваше што ѝ помогнало најмногу за постигнатиот успех и сподели совети со учесниците.

- УСПЕШЕН ДЕН 5 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

@IvanovSchoolForYoungLeaders
@islaa.mk
@FoundationAllianceofCivilizations

Денес предавање за младите учесници на 12-та Школа за млади лидери на Претседателот Иванов одржа г. Ендру Пејкоф постариот, основач и претседавач на компанијата Niagara Bottling, LLC.

Господинот Пејкоф во својата презентација зборуваше за неговата животна приказна и за патот на развивањето на неговиот бизнис. Како биле почетоците и како го развивал фамилијарниот бизнис до компанија која е број еден во САД за пакување на вода и пијалаци, и национален лидер во САД за висококвалитетна флаширана вода со пристапна цена. Компанија која денес поседува производствени капацитети низ САД и низ светот, со огромни успеси и награди, која работи со глобално познати брендови, а која некогаш започнала само со еден мал магацин, неколку машини и неколку камиони за достава. Компанија која моментално своето производство го носи на повисоко ниво, вложува во одржливи решенија, запазува највисоки стандарди, ја зголемува ефикасноста и чинењето на производството и нуди најквалитетни производи.

Презентацијата на г. Пејкоф беше многу интересна за учесниците, кои имаа прилика да постават и прашања. Тој им го претстави својот животен пат и им овозможи да научат и слушнат за успехот. Успех кој не признава кризи, туку ги гледа како предизвици, успех кој не отстапува кога има препрека, туку гледа други можности, успех кој не прифаќа грешка, туку гледа научена лекција, успех кој не поддржува повлекување, туку препознава прилика за развој и иницијатива.

Лекцијата на Ендру Пејкоф постариот беше приказна која учесниците со внимание ја проследија, затоа што истакнуваше и посочуваше совети кои треба младите Македонци да ги следат и да ги применуваат со цел да постигнат успех во својата професионална област. Да бидат лидери, да бидат успешни, г. Пејкоф им порача на учесниците, и нагласи дека треба да бидат упорни, трудољубиви, љубопитни, да преземаат иницијатива, да вложуваат во своето образование, да научат од грешките, да го развиваат духот на претприемништво, да имаат силна мотивација, секогаш да ги препознаваат можностите, да не прифаќаат ништо помалку од најдобар квалитет. Да не прифаќаат ништо помалку од успех.

- УСПЕШЕН ДЕН 4 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

- УСПЕШЕН ДЕН 4 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

@IvanovSchoolForYoungLeaders
@islaa.mk
@FoundationAllianceofCivilizations

Учесниците на 12-та Школа за млади лидери на Претседателот Иванов, денес, имаа можност да го проследат предавањето на Претседателот на Република Србија, Александар Вучиќ, на генералната тема на школата „Лидерство во акција“.

Претседателот на Република Македонија 2009-2019, д-р Ѓорге Иванов, го поздрави високиот гостин и својот пријател Претседателот Вучиќ, и му се заблагодари за прифаќањето на поканата за негово онлајн гостување како предавач на Меѓународната обука за млади лидери.

Претседателот Вучиќ во предавањето до младите учесници сподели искуства и примери од неговото политичко и државничко искуство, неговите одговори и позиции во однос на најголемите предизвици на денешницата, како на пример пандемијата, како и неговото гледање на иднината на нашиот цел регион. Тој укажа дека денес е најзначајно да се прифатат промените кои се случуваат на генерално ниво и да се најде начин како да се адаптираме, како да се прилагодиме најсоодветно на истите. Особено за идните лидери, кои би требало да работат во такви услови, на брзи и огромни промени, не само во политиката, туку и во економијата, односно во скоро сите области. Прашањето кое им го постави на учесниците на почетокот на предавањето беше што можат да преземат и што може да направат оние кои се на високи и одговорни функции денес и оние кои ќе бидат на тие позиции утре. Претседателот Вучиќ рече дека многу луѓе се приклонуваат кон ставот дека судбината е одредена однапред и не преземаат иницијатива, што смета дека не е правило, и дека треба секогаш да се трудиме и работиме повеќе за да бидеме подобри од тие што биле пред нас, да целиме кон повисоки стандарди, да ги имаме своите соништа и да ги следиме и да се обидуваме да ги исполниме. На младите учесници им порача дека не треба да губат време, да почнат што порано да работат на остварување на своите соништа, затоа што времето брзо проаѓа. Да сонуваат големи соништа, да посакуваат повеќе, да си поставуваат поголеми стандарди, да имаат големи планови и да не се осврнуваат на критичарите. Претседателот Вучиќ рече дека нашиот регион имаше многу тежок период и дека тешко за некоја држава од нашиот регион можеме да кажеме дека таа го живее своето „златно време (златна доба)“. Но, тоа не треба да нѐ обесхрабрува и не треба да си дозволиме да го прифаќаме ставот на другите и да се поистоветуваме со нивните стереотипи за нашиот регион, туку да работиме и да се трудиме да напредуваме. Да не бидеме скептични, да не плачеме над нашите судбини, туку да преземеме нешто и за нас и за нашите земји. Смета дека државите од регионот, не само Македонија, не само Србија, или која било друга држава, се соочува со реални предизвици. Не ни требаат празни ветувања и големи мудрости, тоа веќе не е доволно, туку се потребни конкретни чекори, на пример, почеток на преговори.

Претседателот Вучиќ напомена дека успесите за нашиот регион ќе бидат поприсутни и повидливи ако заедно работиме, ако се поддржуваме, ако заеднички преземаме инцијативи. Да се почитуваме меѓусебно и да се зближуваме, а не да се разделуваме, да наоѓаме заеднички именители како единствена опција за заеднички напредок, да не ги бараме и истакнуваме работите кои нѐ делат, туку да ги наоѓаме оние нѐ поврзуваат, да ги соединиме силите, интересите и да не се поделуваме, потребни сме си едни на други. Да не бидеме само љубезни соседи, туку и да соработуваме и да се поддржуваме. Зборуваше и за иницијативата Отворен Балкан и рече дека како помали држави мораме да работиме заедно, да се поддржуваме, да им противречиме на сите тие кои нѐ потценуваат. Да им овозможиме подобри услови на сите граѓани, дека на тој начин сите ќе ги почувствуваме бенефитите, и дека таа инцијатива ќе биде сѐ попримамлива идеја и за останатите држави од регионот. Зборуваше за областите во кои треба да соработуваме, економија, енергетика, земјоделие, ИТ, и многу други, како и за можностите за привлекување на инвестиции во целиот регион.

На крајот, Претседателот Вучиќ се заблагодари уште еднаш до Претседателот Иванов за поканата и ја поздрави неговата иницијатива за препознавање и вложување во идните лидери, а на учесниците им посака успешно завршување на школата и им порача да бидат храбри, упорни, сигурни, полни со самодоверба, амбициозни и да бидат десет пати поуспешни од тоа што денешните лидери се.

- УСПЕШЕН ДЕН 3 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

- УСПЕШЕН ДЕН 3 – 12та ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

@IvanovSchoolForYoungLeaders
@islaa.mk
@FoundationAllianceofCivilizations

Денес, на 12-та Школа за млади лидери на Претседателот Иванов, предавање за учесниците одржа Рза Алијев, Менаџер за развој и имплементација на политики, стратегија и одржливост во компанијата Бритиш Петролеум и член на Бордот на World Monuments Fund. Рза Алијев во предавањето за учесниците најголем дел посвети на климатските промени и кои процеси се случуваат на глобално ниво како одговор на тој предизвик, кои иницијативи се преземаат, кои се успешни приказни, а кои се декларативни одговори. Зборуваше за одржливоста, за COP26, за Парискиот договор, за Целите за одржлив развој. Посочи примери на земји и компании кои имаат преземено повеќе во однос на климатските промени, истакна каков е однос на големите и на малите земји на ова прашање, колку се нивните капацитети и како се поставуваат во однос на тоа прашање. Информираше за процесот на декарбонизација, за транзицијата на земјите во таквите процеси, за јаглеродните отпечатоци, за страната на планетата во тој контекст, за страната на луѓето и за страната на компаниите. Посочи дека посветувањето на менаџирање на одржливоста, на концептот еколошка правда, се темите на кои треба да се работи сѐ повеќе. Во однос на зелената енергија, го истакна моментот на нејзината нестабилност и прекините на продукција. За енергетските реагенси смета и се надева дека нафтата и јагленот би требало да се намалат во догледно време, додека гасот ќе биде актуелен подолг период. На крајот, рече дека има надеж за наоѓање решение, сѐ додека има желба да се најде решение.

- УСПЕШЕН ДЕН 2 – 12-ТА ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

Кабинетот на поранешниот Претседател на Република Македонија 2009-2019, проф. д-р Ѓорге Иванов, информира дека синоќа (12.11.2021 година) започна 12-тата Меѓународна обука за млади лидери на Претседателот Иванов.

Дванаесеттата Школа за млади лидери на Претседателот Иванов, на тема „Лидерство во акција“, се одржува во периодот 12-27 ноември 2021 година во комбинирано издание, онлајн и со две сесии со присуство во живо, едната во Скопје и втората сесија на свечено затворање во Охрид. Школата има четириесет учесници и петнаесет предавачи од Македонија и од странство.

Претседателот Иванов ја отвори 12-та Школа за млади лидери и на почетокот истакна зошто генералната тема на овогодинешната школа е „Лидерство во акција“, надоврзувајќи се на минатогодишната тема „Лидерство во услови на глобални кризи“. Во своето обраќање тој зборуваше за глобалните светски процеси и предизвици од политички аспект, аспект на екологија, бизнис, енергетика, пандемијата со ковид. Нагласи и дека секоја цивилизација не е уништена од други, туку самата себе се уништува. Уништена е природата, намалени се природните ресурси, но сепак ова е период во кој мора да се најде сила и да се наоѓаат нови креативни решенија, кои ќе одговорат на предизвиците. Иванов пред учесниците говореше и за тоа дека највозвишена слобода на еден народ е кога ќе ја создаде својата држава, а улогата на државата е да создаде нација, а улогата пак на нацијата е да ја чува државата за чие опстојување неопходни се национални институции. Претседателот Иванов даде свои видувања за развојот на градовите, индустријата и нивното прилагодување на потребите на светската популација во наредните 10 години. Се осврна и на тоа дека сѐ повеќе жени во периодот на 20-тиот век се образувале и затоа и сѐ повеќе, особено во оваа деценија тие ќе заземаат клучни менаџерски, раководни и лидерски позиции. Во своето обраќање поранешниот претседател се задржа и на сѐ поактуелнoто прашање поврзано со екологијата, како и со можните енергетски предизвици. Тој истакна дека за сите овие актуелни состојби на кризи и големи промени, потребно е повторно враќање на моралното лидерство со луѓе кои ќе имаат цел да ја вратат надежта за благосостојба. Претседателот Иванов нагласи дека во човековата историја секогаш било и ќе остане дека искреноста, посветеноста кон иднината, компетентноста и стручноста, инспиративноста, интелектуалната храброст, слободоумноста, чесноста и посветеноста кон младите генерации биле и останале вредности и доблести кои ги одликуваат лидерите кои останале и ќе остануваат препознаени од сите генерации.

На свеченото отворање на Школата, покрај претседателот Иванов, своја порака до учесниците упати и Министерот за надворешни работи на Република Турција, г. Мевлут Чавушоглу, кој рече дека со задоволство ја прифатил поканата од Претседателот Иванов бидејќи и двајцата го споделуваат уверувањето дека денешната младина има потенцијал за иднината и дека треба да се препознае и поттикне тој потенцијал. Нагласи дека денес сѐ појасна станува потребата од силно и визионерско лидерство. На младите учесници, како можни идни лидери, им порача дека деновите на нивното лидерство ќе дојдат побрзо од тоа што тие очекуваат. Споделувајќи примери од неговото искуство на високи и одговорни позиции, им даде неколку совети на учесниците и препораки за успешно лидерство, како тоа дека успешниот лидер мора да работи според морален компас и да биде доверлив и сигурен, дека добриот лидер треба да воспостави балансирани односи дека успешниот лидер мора да се прилагоди на променливите услови, затоа што промените се случуваат многу побрзо од порано. На крајот во своето предавање, министерот Чавушоглу истакна дека се соочуваме со тежок момент во историјата, и дека климатската криза, зголемените нееднаквости и масовното раселување ги предизвикуваат лидерите на утрешнината да бидат жестоки и имагинативни. Да ги носат своите одлуки врз основа на нивното срце и ум, но и да го практикуваат она што го проповедаат, да бараат рамнотежа во односите и да се прилагодуваат на промените. Посакувајќи им успешно учество на Школата, им порача на учесниците да бидат спремни да научат што повеќе од превадачите, и со сопствената мудрост и идеали, да бидат чекор поблиску до нивната цел.

На утрешната сесија, ќе се обрати Претседателот на Република Србија, Александар Вучиќ, кој ќе одржи предавање за учесниците на генералната тема „Лидерство во акција“.

Меѓу предавачите на овогодинешната Школа за млади лидери на Претседателот Иванов се Сани Шенер, главен извршен директор и Претседател на „ТАВ аеродроми“; Рза Алијев, Менаџер за развој и имплементација на политики, стратегија и одржливост во компанијата Бритиш Петролеум и член на Бордот на World Monuments Fund; Рашела Мизрахи, пратеник во Собранието на Република Македонија; Ендру Пејкоф, Претседавач на компанијата Niagara Bottling LLC; Јордан Битов, Ко-сопственик и издавач, Torstar Corporation, и основач и ко-сопственик на Nordstar Corporation; Елизабет Наумовски, Заменик претседател за маркетинг во компанијата Caldwell Securities Ltd. и добитник на повеќе награди како застапник за финансиска писменост; Џери Наумоф, Претседавач на Бордот на компанијата Taskforce; Методија Колоски, Ко-основач и Претседател на Обединета Македонска дијаспора; Зоран Костовски, Директор на компанијата за деловна едукација, менаџмент консалтинг, образование и обука „Мотива“; Хозе Антонио Моралес, Извршен директор на компанијата Lincoln Iceland Company LLC.

Свечено затворање на Школата за млади лидери се планира во Охрид на 27 ноември 2021 година.

Школата за млади лидери е иницијатива на претседателот Ѓорге Иванов која започна на почетокот на неговиот прв мандат. Првата Меѓународна обука за млади лидери се одржа во 2010 година. Оттогаш, во текот на досегашните 11 обуки, учествуваа околу 440 млади луѓе од земјата и од странство, со различен академски и професионален фокус. Пред единаесетте генерации учесници на Школата за млади лидери, предавања одржаа над 220 реномирани предавачи од Република Македонија, Европа и светот. Во 2018 година, проектот Школа за млади лидери на Претседателот Иванов, е прогласен за најдобар социјално одговорен проект во Европа за 2017 година од страна на Светскиот инвестициски форум на бизнис ангели.

- Отворање на 12-та Школа за млади лидери на Претседателот Иванов, 12 ноември 2021 година

12. ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ „Лидерство во акција“


Меѓународната обука за млади лидери на проф. д-р Ѓорге Иванов, Претседател на Република Македонија 2009-2019, традиционално се одржува од 2010 година. Вкупно, во досегашните 11 обуки, учествуваа околу 440 млади луѓе од целата земја, но и од странство, со различен академски и професионален фокус. Пред единаесетте генерации учесници на Школата за млади лидери, свои предавања одржаа над 220 реномирани предавачи од Република Македонија, Европа и светот. Во 2018 година, Школата за млади лидери е прогласена за најдобар социјално одговорен проект во Европа за 2017 година од страна на Светскиот инвестициски форум на бизнис ангели.

Мисијата на школата е да ги стимулира позитивните вредности кај младите лидери и идни политички, културни и економски предводници на нашата земја, но и да го развие нивниот капацитет за справување со глобалните предизвици, меѓународната конкуренција и културните и религиски различности.

Програмата е намената за млади луѓе со завршено високо образование до 35 години, дипломирани студенти и професионалци со работно искуство. Се очекува учесниците да имаат желба континуирано да ги развиваат и усовршуваат нивните лидерски вештини и да придонесуваат за позитивен развој на општеството и околината во која живеат и работат.

Оваа година, Школата за млади лидери ќе се организира комбинирано (онлајн и со физичко присуство) во периодот 12-28 ноември 2021 година, со настани предвидени за време на трите последователни викенди, како и за време на одредени работни денови во тој период, но по 17:00 часот.

Обуката опфаќа предавања од предавачи од земјата и од странство, фокусирани на искуствата и знаењата кои би ги поттикнале учесниците да размислуваат аналитички и да креираат заеднички решенија за предизвиците со кои се соочуваат, и нивно интерактивно вклучување на предавањата.

Предавањата ќе се одвиваат на македонски и англиски јазик.

Бројот на учесници е ограничен, а право на учество имаат сите млади од Република Македонија и од странство кои ги исполнуваат следниве услови: - Одлично познавање и активно користење на англиски јазик; - Просек од високо образование, еднаков или поголем од 8,5. (или еквивалентно доколку се работи за диплома од странство) ќе се смета за предност; - Работно искуство од една до пет години, како и магистратура од соодветната област, ќе се смета за предност.

Потребни документи за aпликација (електронска копија):
- Кратко мотивациско писмо,
- Биографија,
- Уверение за положени испити/Диплома, и
- Две препораки од вашата организација, компанија или факултет.

Критериумите за селекција на учесниците во Школата за млади лидери се засновани, пред сè, врз академските и професионалните достигнувања на апликантите.

Вашата апликација можете да ја поднесете најдоцна до 22 октомври 2021 година (петок), на следниот линк

По вашата апликација, постои можност да бидете повикани на интервју (онлајн).

Во случај на технички проблеми при аплицирањето и дополнителни прашања, можете да се обратите и на следната е-пошта: contact@gjorgeivanov.mk

#Школазамладилидери #Школазамладилидери2021 #ИСЛАА #ФондацијаАлијансанацивилизации #младилидери #лидерство #лидер/ка #новипредизвици #вистинскилидери #новилидери #модернилидери #новипредизвици #бизнислидери #глобалнилидери #политичкилидери #големичекори #иницијатива #инспирација #лидерствовоакција

Согласно актуелната состојба со корона кризата и протоколите и мерки за превенција, церемонијата на доделување на сертификатите за завршување на 11. Школа за млади лидери се организираше во Кабинетот на претседателот Иванов, но во помали групи, најмногу до тројца учесници, во периодот од 24 февруари до 5 март 2021 година.

Претседателот Иванов лично им ги врачи сертификатите за успешно завршување на 11. Школа за млади лидери на повеќе од половина учесници. Другите учесници, кои не беа во можност да го посетат Кабинетот на претседателот Иванов, своите сертификати ги добија по редовна или електронска пошта.

11. Школа за млади лидери на претседателот Иванов се организираше во декември 2021 година на која учествуваа 40-тина млади учесници, кои имаа можност да проследат предавања на 15-тина предавачи на темата „Лидерството во услови на глобални кризи“.

Вчера заврши 11. Школа за млади лидери на поранешниот Претседател Иванов, која по прв пат се организираше онлајн. Школата се одржа во периодот од 5-20 декември 2020 година на темата „Лидерството во услови на глобални кризи“.

11. Школа за млади лидери имаше четириесет учесници од Република Македонија и од странство, кои имаа прилика да слушаат предавања од петнаесет предавачи, исто така, од земјата и од странство.

На свеченото отворање на Школата на 5 декември, покрај претседателот Иванов, своја порака до учесниците испратија Премиерот на Република Словенија, Јанез Јанша, и поранешниот Претседател на Чешка Република 2003-2013, Вацлав Клаус, а свое предавање одржа и проф. д-р Исмаил Серагелдин, ко-претседавач на Меѓународниот центар Низами Ганџави и основачки директор на новата Александриска библиотека.

Потоа, следеа предавањата на Сани Шенер, Главен извршен директор и Претседател на Бордот на директори на ТАВ Аеродроми; Макс Сонг, специјалист за податоци и градење на инвестициски можности и Главен извршен директор на Карбонбејз; Данит Гал од Центарот за иднина на разузнавањето Леверхулм на Универзитетот Кембриџ; Кордел Картер, Извршен директор на програмата Сократ на Институтот Аспен; Рза Алијев, Менаџер за развојни политики и имплементација, Бритиш Петролеум; г-ѓа Симона Чаминска, Национален координатор на Глобалната недела на претприемништвото; Данела Арсовска, Претседател на Сојуз на стопански комори на Македонија; Рашела Мизрахи, пратеник во Собранието на Република Македонија. Учесниците на Школата имаа можност да проследат и две онлајн обуки и активности кои беа организирани од Зоран Костовски, директор на компанијата за деловна едукација, за менаџмент консалтинг, образование и обуки „Мотива“.

Вчера, 20 декември 2020 година, на последниот ден на Школата за млади лидери, Амани Бен Лакдар од компанијата за виртуелна едукација Солија ги презентираше можностите и предностите на виртуелното образование и обука, по што следеше презентацијата и панел дискусија организирана од ИСЛАА – Алумни Асоцијацијата на Иванов Школа за млади лидери, односно претседателката на ИСЛАА, Катерина Климовска, придружувана од неколку поранешни учесници на школата.

Исто така, вчера пред учесниците се обрати и Бајбарс Алтунташ, Извршен директор на Светскиот инвестициски форум на бизнис ангели, партнер организација на Глобалното партнерство за финансиска инклузија Г20, кој зборуваше за ефектите на пандемијата врз стартап и бизнис компаниите. Во 2018 година, Школата за млади лидери е прогласена за најдобар социјално одговорен проект во Европа за 2017 година токму од страна на овој престижен форум.

На крајот на Школата за млади лидери се обрати претседателот Иванов, кој заблагодарувајќи се до сите учесници, предавачи, ко-организатори на Школата и гости, го истакна задоволството од сите кои дадоа придонес за реализација за првата онлајн Школа за млади лидери. На младите учесници им даде совети како да напредуваат на професионален, но и на личен план. Им посака на сите учесници да ја почувствуваат моќта на успехот, да знаат да се носат со неа, да ја трошат и посветуваат својата енергија на позитивни мисли и да се опкружуваат со иновативни и креативни успешни луѓе. Барајте го невозможното, работете сонот да ви стане јаве, им порача претседателот Иванов на младите лидери.

Школата за млади лидери е лична иницијатива на претседателот Ѓорге Иванов која започна на почетокот на неговиот прв мандат. Во текот на досегашните 11 обуки, учествуваа околу 440 млади луѓе од целата земја и од странство, со различен академски и професионален фокус. Пред единаесетте генерации учесници на Школата за млади лидери, предавања одржаа 220 реномирани предавачи од Република Македонија и од странство.

- Заврши 11. Школа за млади лидери на претседателот Иванов, 5-20 декември 2020 година

Школата за млади лидери на Претседателот Иванов успешно го заврши и седмиот ден од онлајн обуката на младите учесници.

Денес, на општата тема на 11. Школа за млади лидери „Лидерство во услови на глобални кризи“, пред учесниците одржа предавање Cordell Carter, Executive Director of Socrates Program at Aspen Institute.

Господинот Картер во своето предавање “Becoming an Inclusive Republic”, се осврна на Декларацијата за независност на САД и од историска перспектива го постави прашањето за значењето на “We”. Главните прашања кои ги посочи беа: “Who are We?”, “Evolution of We”, Inclusion Act, Voting Act и прашањето “What from here? How to become an Inclusive Republic”.

Во таа насока, ги елаборираше секој од наведените сегменти во процесот на разбирањето и значењето на “We”, односно „Ние“, во контекст на времето на донесување на основачките документи на САД, но го анализираше нивното значење и поимање и од денешна современа перспектива. Притоа, ја објасни промената на „Ние” низ текот на времето и остварувањето на човековите права и слободи во едно демократско општество. Затоа е потребно многу труд и лидерство за остварување на таква висока, но достижна цел на инклузивна република, посочи Картер пред учесниците на Школата за млади лидери.

Неговото предавање предизвика голем интерес кај учесниците, кои со нивните прашања предизвикаа плодна и конструктивна дискусија на оваа тема.

- УСПЕШЕН ДЕН 7 – 11. ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

Школата за млади лидери на Претседателот Иванов успешно го заврши и шестиот ден од онлајн обуката на младите учесници.

Денес, на општата тема на 11. Школа за млади лидери „Лидерство во услови на глобални кризи“, а во насока на предизвиците на новите технологии и вештачката интелигенција, со учесниците разговараше Danit Gal, Associate Fellow, the Leverhulme Centre for the Future of Intelligence at the University of Cambridge.

Данит Гал одговараше на прашањата на учесниците кои беа на тема вештачката интелигенција, можноста и обидите за регулација на оваа област, етичноста и рамноправноста кај алгоритмите, за темната мрежа/интернет, ранливоста на човештвото на вештачката интелигенција, но и подигање на свесноста на човештвото за зависноста од вештачката интелигенција. Двојната употреба на вештачката интелигенција е реалност и треба да бидеме свесни колку таа се користи за напредок и позитивни работи, исто така е и злоупотребувана. Данит Гал смета дека како напредува технологијата и вештачката интелигенција, човештвото треба да станува свесно дека еволуцијата оди чекор понапред од нас, и дека ние сме инфериорни кон вештачката интелигенција, и колку побрзо го прифатиме тој факт, толку побрзо ќе се прилагодуваме на новата реалност. Гал посочи дека најважно е да се работи на етички алгоритми, рационални алгоритми кои мора редовно да се коригираат и надградуваат да одговараат на потребите на луѓето. Ито така, нагласи дека колку поспособна станува вештачката интелигенција, толку поспособни оператори мора да има. Значи, да инвестираме во нашето разбирање, знаење и ракување со технологијата.

- УСПЕШЕН ДЕН 6 – 11. ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

Учесниците на Школата за млади лидери на Претседателот Иванов следеа уште една успешна онлајн обука, овој пат организирана од „Мотива“, компанија за деловна едукација, за менаџмент консалтинг, образование и обука. Обуката која синоќа ја следеа младите учесници беше втора по ред, а ја одржа тимот на „Мотива“, преводен од Извршниот директор Зоран Костовски.

Мотива веќе 11 години ја поддржува Школата за млади лидери на Претседателот Иванов и редовно секоја година држи обуки за учесниците, но оваа година по прв пат беше во онлајн издание. Обуките на „Мотива“ за младите учесници беа организирани два пати во текот на работните денови. Првата обука беше одржана минатата недела, на 10 декември, а втората, вчера, 14 декември.

Зоран Костовски пред младите учесници зборуваше за тоа што го прави лидерот вистински и успешен. Споделувајќи позитивни примери и објаснувајќи ги карактеристики на лидерство, тој ги пренесе и ги презентираше алатките и вештините со кои треба да се служат младите за да постигнуваат успеси во својата кариера и во својот живот и околина, потоа, за остварувањето на нивниот сон, за упорноста, мотивацијата и за проценка на исплатливоста на нивните лични инвестиции.

Костовски ги презентираше стиловите на лидерството, како да се оформува стилот на лидерство и како да се подобрува и адаптира. Зборуваше за меките вештини кои треба да ги поседува лидерот, како тој треба да ја зголемува својата мрежа на контакти, како да биде секогаш навремено информиран за актуелностите, како да ја гради и зголемува довербата кај луѓето со кои соработува.

Мотива организираше и неколку вежби и задачи на кои требаше да одговорат учесниците, а додели и неколку виртуелни награди за најдобрите.

- УСПЕШЕН ДЕН 5 – 11. ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

Успешно заврши и четвртиот ден со онлајн предавањата на Школата за млади лидери на Претседателот Иванов.

„Лидерство во услови на глобални кризи“ како општа тема на школата беше обработена и во предавањата на денешните две предавачки, г-а Рашела Мизхрахи, пратеник во Собранието на Република Македонија, и г-а Данела Арсовска, Претседател на Сојузот на Стопански комори.

Спомнувајќи ги претходните нејзини учества како предавач на Школата на Претседателот Иванов, Рашела Мизрахи во своето предавање „Лидерот е лав“ зборуваше за особеностите на вистинскиот лидер препознаени низ карактеристиките на лавот, посочувајќи ја храброста како најзначајна особина која мора да ја поседува лидерот. Таа ги набројуваше оние особености кои ги препознава кај вистинските лидери, како и кај лавот, од онаа анималистичка перспектива на човекот, низ примери од секојдневниот живот и нејзини лични примери. Пожртвуваноста, довербата во тимот, комуникацијата, емпатијата, дисциплината, интегритетот, подготвеноста, внимателното слушање и забележување на сите, рамноправноста со соработниците, успешноста како тим, не како индивидуалец, одржувањето на својата визија и перцепција, скромноста, се одлики на вистинскиот лидер. Интересна беше паралелата која ја истакна со хормоните допамин, серотонин, окситоцин, за среќата, храброста, гордоста, емпатијата и лојалноста. За во политиката Мизрахи нагласи дека она што треба најмногу да ги одликува вистинските лидери е одговорноста, скромноста, запазувањето на детали и слушањето и разбирањето на добронамерните коментари, прашања и критики.

Надоврзувајќи се на претходното предавање, Данела Арсовска од своја перспектива зборуваше за лидерството низ призмата на областа во која таа е професионално ангажирана, но и низ примерите од нејзината професионална кариера. Таа истакна дека лидер не се раѓа, туку се создава. Дека сите имаат потенцијал, но надградувањето и работењето се тие кои проектираат успех. Нагласи дека Школата за млади лидери е добар пример како може да им се помогне на младите учесници, да го насочат и развиваат нивниот потенцијал, не само во нивната кариера, туку и лично. Според Арсовска, најважната и најценета карактеристика на лидерството е интегритетот на лидерот. Таа зборуваше и за лидерите како добри менаџери, кои имаат потенцијал и можност да научат, но и успешно да делегираат. Успехот може да се постигне ако лидерот е опкружен со добри, мудри и најспособни луѓе, дека неговиот успех не може да биде индивидуален, туку тимски. Лидерот треба да биде отворен за комуникација, да поседува храброст, да има почит, да има харизма, а најмногу од се да има визија. Лидерството не може да биде успешно ако лидерот нема или има само малку следбеници. Лидерот продуцира резултати, се адаптира брзо, ризикува но со проценка, користи легитимни тактики. Смета дека во земјава она што најмногу недостасува е меритократија и дека треба да се подигне јавната свест за ова прашање. За да се успее како лидер, поединецот не треба да посегнува по манипулации и лаги кои даваат краткотрајни инстант резултати. Смета дека лидерот се докажува токму во кризни ситуации и тогаш се препознава вистинскиот лидер.

Според дискусијата и бројот на прашањата од учесниците, оваа сесијата помина одлично, на општо задоволство на сите страни, организаторите, предавачите и, најважно, самите млади учесници.

- УСПЕШЕН ДЕН 4 – 11. ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

Школата за млади лидери на Претседателот Иванов успешно го заврши и петтиот ден од онлајн обуката на младите учесници.

На општата тема на 11. Школа за млади лидери „Лидерство во услови на глобални кризи“, денес, предавања одржаа Max Song, Founder аnd CEO of Carbonbase, Venture Partner at Pacific Century Group, и Rza Aliyev, Policy Development & Implementation Manager, British Petroleum.

Двајцата предавачи како најголема криза со која се соочува човештвото ги издвоија климатските промени. Тие зборуваа што се презема досега, но и што сеуште треба да се иницира и да се презема не само од лидерите, туку и од секој еден поединечно, за да се намалат ефектите на климатските промени.

Макс Сонг во предавањето пред младите учесници зборуваше за пазарите на јаглерод, за актуелните промени и активности во таа област, за блокчејн револуцијата, за вештачката интелигенција, за дигиталниот капитал, крипто валутите и др. Тој рече дека негова мисла водилка е дека сомнежот убива многу повеќе сонови отколку неуспехот и дека младите лидери треба да бидат упорни и одлучни за остварување на нивните сонови.

Рза Алијев се надоврза на претходното предавање и зборуваше за одржливоста, за Парискиот договор и за Целите за одржлив развој. Посочи позитивни примери на земји и компании кои имаат преземено многу повеќе во однос на главните и најголеми загадувачи во светот. Од свој личен пример зборуваше и за тоа што секој еден поединечно треба да преземе, која е нашата лична одговорност, како треба да напредуваме во животот, но и како секогаш да ги следиме нашите цели.

Двајцата предавачи дадоа и свое размислување како ќе се развива светот после пандемијата на Ковид19 и како треба да се искористи времето кое сите го поминуваме сеуште почитувајќи мерки и протоколи за заштита.

- УСПЕШЕН ДЕН 3– 11. ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ

Долгогодишната партнерска организација на Школата за млади лидери на Претседателот Иванов, Меѓународниот центар Низами Ганџави ги покани учесниците на овогодинешната школа да присуствуваат на онлајн настанот на доделување на Меѓународната награда Низами Ганџави за 2020 година.

Учесниците имаа можност да ги слушнат говорите на г-ѓа Ваира Вике-Фрајберга, Претседател на Летонија 1999-2007 и Ко-Претседавач на Меѓународниот центар Низами Ганџави; г-ѓа Кери Кенеди, Претседател на Фондацијата човекови права Роберт Ф. Кенеди; и д-р Исмаил Серагелдин, Ко-Претседавач на Меѓународниот центар Низами Ганџави, заменик-претседател на Светска банка 1992-2000 и основач и директор на Библиотеката Александрија.

Добитник на Меѓународната награда Низами Ганџави за 2020 година, како признание за неговата глобална борба против експлоатацијата на децата, е д-р Каилаш Сатајарти, добитникот на Нобеловата награда за мир. Тој во совето обраќање рече дека иднината на нашата планета зависи од тоа како ги третираме децата, дека тие се нашата иднина, а иднината не може да се одбива. Според него, треба да работиме на создавање синџир на благодарност и мрежа на одговорност врз основа на сочувство, благодарност, одговорност и толеранција.

Добитник на Меѓународната награда Низами Ганџави за 2020 година, како признание за неговите ангажмани за Одржливите развојни цели на глобално ниво, е д-р Џефри Сакс, универзитетски професор на Универзитетот Колумбија и специјален советник на Генералниот секретар на ОН. Д-р Џефри Сакс ја спомена потребата за прилагодување на политиките и институциите за да се создаде „политика на добро“ на глобално ниво. Тој ја окарактеризира 2020 година како година на одлучна соработка, во која е неопходна активна дипломатија за да се создаде пат на глобална соработка.

- Учесниците на 11. Школа за млади лидери присуствуваа на церемонијата на доделување на Наградата на Меѓународниот центар Низами Ганџави за 2020 година

Школата за млади лидери на Претседателот Иванов успешно го заврши и вториот ден, односно првиот викенд од онлајн обуката на младите учесници.

На темата „Лидерство во услови на глобални кризи“, денес, со свои интересни предавања пред учесниците настапија г. Сани Шенер, главен извршен директор и Претседател на „ТАВ Аеродроми“ и г-ѓа Симона Чаминска, Национален координатор на Глобалната недела на претприемништвото.

Во своето предавање, г. Сани Шенер искажа задоволство од можноста да биде пак предавач на Школата. Зборуваше за ТАВ Аеродроми за време на корона кризата, како влијае на нивната компанија, кои се критичните точки, кои се нивните активности за да ја амортизираат генералната загуба на компанијата. Посочи дека кризниот менаџмент е особено значаен, како превентивна медицина за бизнисот, Лидерот како менаџер мора да ја гледа широката слика, да има имформации и да знае се што се случува во компанијата, да ги знае сите сегменти, и цела комплексност на бизнисот. Се осврна на превенцијата, мерките, протоколите кои ги презема за заштита и безбедност на своите вработени и за патниците. За да станат вистински лидери, покрај факултетското образование, нагласи дека треба постојано да инвестираат и да го прошируваат своето знаење, да имаат знаења од што повеќе области. За да се биде на висока менаџерска позиција во компаниите, лидерот мора да знае буквално се. Да се биде глобална компанија, мора да имате глобални решенија. Да бидете глобален лидер, мора да имате глобални знаења. На крајот упати порака до младите лидери, работете вредно, трудете се многу, вложувајте во себе, своето образование, бидете фокусирани, бидете транспаренти...

Г-ѓа Чаминска зборувајќи како Национален координатор на Глобалната недела на претприемништвото, предаваше на темата Научените лекции од Глобалната недела на претприемништвото: Предизвиците на „новата нормалност“ и градењето на отпорни екосистеми. Таа нагласи дека иднината на Македонија е во соработката. Македонија треба да е дел од поголема унија за да успее.

Двајцата предавачи денес рекоа дека за успешно лидерство во криза најбитни се меките вештини и емпатијата.

- https://www.facebook.com/IvanovSchoolForYoungLeaders/posts/3569873056391805

- https://www.facebook.com/exmacedonianpresident

- https://www.facebook.com/IvanovSchoolForYoungLeaders

- https://www.facebook.com/islaa.mk

- https://www.facebook.com/FoundationAllianceofCivilizations

Денес, започна 11. Школа за млади лидери на поранешниот Претседател Иванов, која по прв пат се организира онлајн. Единаесеттата Школа за млади лидери ќе се одржи во текот на овој и следните два викенди во декември на темата „Лидерството во услови на глобални кризи“.

Оваа година, околу четириесет учесници и дваесетина предавачи од Македонија и од странство ќе бидат дел од 11-тата Школа за млади лидери која се одржува на платформата Zoom.

На свеченото отворање на Школата, покрај претседателот Иванов, своја порака до учесниците испратија Премиерот на Република Словенија, Јанез Јанша, и поранешниот Претседател на Чешка Република 2003-2013, Вацлав Клаус, а свое предавање одржа и проф. д-р Исмаил Серагелдин, основач и директор на новата Александриска библиотека во Александрија.

Претседателот Иванов во своето обраќање до учесниците порача дека лидери се тие што ја преземаат иницијатива и одговорност во време на кризи. Истакна дека покрај ковид кризата, светот се соочува со повеќе кризи како што се финансиска, здравствена, хуманитарна, еколошка, криза на ресурси и др. Сепак, нагласи дека во ковид кризата излезе на површина што е потребно да се биде глобален лидер. Се осврна и на успешното справување во Република Македонија со мигрантската криза како позитивен пример на менаџирање во криза. Исто така, ги нагласи особеностите на женското лидерство низ успешни примери.

Словенечкиот премиер Јанша поздравувајќи ги учесниците на Школата нагласи дека добрите лидери стануваат уште подобри кога и ако бидат предизвикани. „Можете да го издржите предизвикот само ако сте самоуверени. Оваа внатрешна сила не е можна без да се познавате себеси, вашите корени, вредности, таленти и можности. Предизвиците го обликуваат карактерот, а карактерот развива мудрост и идеи кои се неопходни за лидер”, рече премиерот Јанша. Тој нагласи дека лидери можат да бидат тие кои не се фиксирани на политичка позиција, но имаат визија, што повлекува дека се свесни за тоа што е императив и каде може да направат компромис.

Поранешниот чешки Претседател Клаус, се осврна на прекумерните активности на властите и злоупотребата на епидемијата на Ковид од страна на медиумите кои шират страв низ целиот свет, кое што резултира со хипотезата на социјална дистанца. Претседателот Клаус рече, „сметам дека тоа е опасен чекор кон забрзување на фрагментацијата и атомизацијата на човечкото општество, кон победата на експерто-кратијата во нашите земји и кон видливата и непобитна загуба на нашите слободи.“ Тој го спореди кажаното со тоа на што помладите генерации не се сеќаваат - комунизмот и отсуството на слободи во тој период – што им наметнува континуирана обврска на постарите генерации на лидери да даваат постојани предупредувања за тоа. „Постои силна коалиција на идеи и на интереси во денешниот свет и постои силна мотивација за злоупотреба на ковид пандемијата за реализација на нивниот план за креирање на „нов храбар свет“, објаснето во многу дистописки дела. Идните лидери треба да бидат подготвени за таков свет.“ За Македонија рече дека треба да го најде нејзиниот modus vivendi во Европа и посебно во или најмалку со ЕУ, што не е лесна задача. Претседателот Клаус потсети и на неговиот познат став, дека ЕУ изгледа подобро однадвор, отколку одвнатре.

Д-р Исмаил Серагелдин во предавањето за младите учесници се осврна на преобликувањето на светскиот поредок и низ теоретски и филозофски пристап го посочи незапирливиот технолошки развој и неговата улога во создавањето на новиот свет. Според него, вистинските лидери треба да ја избегнуваат стапицата на лажните вести и злоупотребата на информациите кои денеска ни се подостапни од кога и да е. Според него, вистинскиот лидер секогаш треба да ја зборува вистината. Поддржувајќи ја инцијативата на Претседателот Иванов и заблагодарувајќи се за повторната можност да ги сподели своите сознанија со овогодинешните млади лидери, д-р Серагелдин истакна дека од голема важност е да го разбереме минатото, да се насочиме кон сегашноста и да создадеме визија за иднината, следејќи ги сопствените вредности.

Меѓу предавачите годинава ќе бидат и Сани Шенер, главен извршен директор и Претседател на „ТАВ аеродроми“; Макс Сонг, специјалист за податоци и градење на инвестициски можности; Данит Гал од Леверхулм Центарот за иднина на разузнавањето на Универзитетот во Кембриџ; Кордел Картер, Извршен директор на програмата Сократ на Институтот Аспен; Рза Алијев, Менаџер за развој и имплементација на политики, Бритиш Петролеум; г-ѓа Симона Чаминска, Глобална недела на претприемништвото во Македонија; Данела Арсовска, Претседател на Сојуз на стопански комори на Македонија; Рашела Мизрахи, пратеник во Собранието на Република Македонија; Амани Бен Лахдар од компанијата за виртуелна едукација Солија, а две онлајн активности на учесниците ќе бидат организирани од компанијата за деловна едукација, за менаџмент консалтинг, образование и обука „Мотива“.

Школата за млади лидери е лична иницијатива на претседателот Ѓорге Иванов која започна на почетокот на неговиот прв мандат. Во текот на досегашните 10 обуки, учествуваа околу 400 млади луѓе од целата земја, но и од странство, со различен академски и професионален фокус. Пред десетте генерации учесници на Школата за млади лидери, свои предавања одржаа над 200 реномирани предавачи од Република Македонија, Европа и светот. Во 2018 година, Школата за млади лидери е прогласена за најдобар социјално одговорен проект во Европа за 2017 година од страна на Светскиот инвестициски форум на бизнис ангели.

Учесниците на досегашните школи се организирани во Алумни асоцијација – ИСЛАА, регистрирана како посебно здружение, коешто низ семинари, панел-дискусии, предавања и учества во младински настани, овозможува продолжување на развојот на нивните знаења и вештини. ИСЛАА, заедно со фондацијата „Алијанса на цивилизациите“ се ко-организатори на 11. Школа за млади лидери на Претседателот Иванов.

11. ШКОЛА ЗА МЛАДИ ЛИДЕРИ НА ПРЕТСЕДАТЕЛОТ ИВАНОВ „Лидерството во услови на глобални кризи“

Меѓународната обука за млади лидери на проф. д-р Ѓорге Иванов, Претседател на Република Македонија 2009-2019, традиционално се одржува од 2010 година. Вкупно, во досегашните 10 обуки, учествуваа околу 400 млади луѓе од целата земја, но и од странство, со различен академски и професионален фокус. Пред десетте генерации учесници на Школата за млади лидери, свои предавања одржаа над 200 реномирани предавачи од Република Македонија, Европа и светот. Во 2018 година, Школата за млади лидери е прогласена за најдобар социјално одговорен проект во Европа за 2017 година од страна на Светскиот инвестициски форум на бизнис ангели.

Мисијата на школата е да ги стимулира позитивните вредности кај младите лидери и идни политички, културни и економски предводници на нашата земја, но и да го развие нивниот капацитет за справување со глобалните предизвици, меѓународната конкуренција и културните и религиски различности.

Програмата е намената за млади луѓе со завршено високо образование до 35 години, дипломирани студенти и професионалци со работно искуство. Се очекува учесниците да имаат желба континуирано да ги развиваат и усовршуваат нивните лидерски вештини и да придонесуваат за позитивен развој на општеството и околината во која живеат и работат.

Оваа година, Школата за млади лидери ќе се организира онлајн, на платформата Zoom, во месец декември, во три последователни викенди, и тоа, 5-6 декември, 12-13 декември и 19-20 декември 2020 година.

Обуката опфаќа предавања од предавачи од земјата и од странство, фокусирани на искуствата и знаењата кои би ги поттикнале учесниците да размислуваат аналитички и да креираат заеднички решенија за предизвиците со кои се соочуваат, и нивно интерактивно вклучување на предавањата.

Предавањата ќе се одвиваат на македонски и англиски јазик.

Бројот на учесници е ограничен, а право на учество имаат сите млади од Република Македонија кои ги исполнуваат следниве услови:

- Одлично познавање и активно користење на англиски јазик;
- Просек од високо образование, еднаков или поголем од 8,5. (или еквивалентно доколку се работи за диплома од странство) ќе се смета за предност;
- Работно искуство од една до пет години, како и магистратура од соодветната област, ќе се смета за предност.

Потребни документи за aпликација (електронска копија):

- Кратко мотивациско писмо,
- Биографија,
- Уверение за положени испити/Диплома, и
- Две препораки од вашата организација, компанија или факултет.

Критериумите за селекција на учесниците во Школата за млади лидери се засновани, пред сè, врз академските и професионалните достигнувања на апликантите.


Вашата апликација можете да ја поднесете најдоцна до 26 ноември 2020 година, на следниот линк

Во случај на технички проблеми при аплицирањето и дополнителни прашања, можете да се обратите и на следната е-пошта:   contact@gjorgeivanov.mk


#Школазамладилидери #Школазамладилидери2020 #ИСЛАА #ФондацијаАлијансанацивилизации #младилидери #лидерство #лидер/ка #новипредизвици #вистинскилидери #новилидери #модернилидери #глобалнакриза #новипредизвици #бизнислидери #здравственилидери #глобалнилидери #политичкилидери #големичекори #иницијатива #инспирација #лидеривокриза #коронакриза


ПОРАНЕШЕН ПРЕТСЕДАТЕЛ НА РЕПУБЛИКА МАКЕДОНИЈА Д-Р ЃОРГЕ ИВАНОВ
бул. „Србија“ бр. 31А, А-212, 1000 Скопјe, Република Македонија

Доколку имате подетални прашања обратете се на следнава е-пошта Е-пошта: contact@gjorgeivanov.mk

Работно време:

Пон - Пет 08:00 до 16:00