Претседателот на Република Македонија 2009-2019, д-р Ѓорге Иванов, вчера во Истанбул учествуваше на Меѓународната конференција „Балканот и Европа – од заедничко минато до заедничка иднина“ под покровителство на Претседателот на Собранието, Н.Е. г. Мустафа Шентоп. Меѓународната конференција се одржува по повод 100 години од основањето на турската република, а ко-организатори се четири универзитети од Република Турција: Истанбулскиот Универзитет и Мармара Универзитетот од Истанбул, Тракискиот Универзитет од Едрене и Намик Кемал Универзитетот од Текирдаг.
Претседателот Иванов се обрати на сесијата на свеченото отворање на конференцијата на темата „Европа и Балканот – од прва Европа до периферија на ЕУ“. На почетокот, претседателот Иванов го честиташе едновековниот јубилеј на Република Турција, спомнувајќи за основоположниците на турската република, Мустафа Кемал Ататурк и Али Фети Окјар, родум од некогашна Отоманска Македонија, односно Румелија. Во говорот, Претседателот Иванов се осврна на митот за Европа и за реална Европа, како и за територијалниот опсег кој го покрива Европа. Од каде потекнува називот, како се толкуваат и подоцна менуваат границите на Европа и како просторот на Балканот каде и се простира првата, стара Европа, сега се наоѓа на периферијата на Европската унија.
„Живееме во време кога еден мировен проект, наречен Европска Унија, денес пред наши очи пропаѓа при неговото соочување со реалноста. За жал, може да се констатира дека денес во 2023 година, Европската унија не е во можност да оствари ниту една своја европска амбиција. Тоа се однесува и на проширувањето кон Западен Балкан.“ рече Иванов, нагласувајќи дека е крајно време да почнеме да размислуваме за Европа без Европската унија. Тој истакна дека во прв план на таа Европа треба да биде среќата на луѓето и колективната солидарност, пред сѐ, на локално и на регионално ниво, како и дека таквата Европа треба да се ослободи од вековните мисионерско империјални аспирации, според кои Европа треба да биде предводник и мерило за целиот свет.
За време на посетата на Истанбул, претседателот Иванов оствари средба со Претседателот на турското Собрание г. Шентоп, со ректорите на четирите универзитети ко-организатори на конференцијата и со други учесници.
