Во Охрид синоќа започнаа сесиите во живо од 14-тата Школа за млади лидери на поранешниот претседател на Република Македонија, проф. д-р Ѓорге Иванов, која се одржува во периодот од 7-19 октомври 2023 година. Првиот дел од програмата се одржа онлајн од 7-10 октомври, а од 11-19 октомври програмата продолжува во Охрид.

Школата беше свечено отворена вчеравечер, од поранешниот претседател Иванов, кој на младите лидери им посака добредојде во Охрид. Им посочи на младите лидери никогаш да не ја губат надежта и трпението и секогаш да размислуваат позитивно, да бидат подготвени континуирано да се образуваат и да се развиваат, а тоа можат да го постигнат со самокритичност, самодоверба и саморефлексија. Исто така, им посака да се стекнат со нови пријателства, нови лидерски вештини и нови знаења кои ќе ги подготват полесно да се соочат со предизвиците на нивниот животен пат.

По неговото поздравно обраќање, како гостин на Школата се обрати и поранешниот претседавач со претседателството на Босна и Херцеговина, проф. д-р Младен Иваниќ, кој на големо задоволство на учесниците зборуваше за лидерството, за одлуките кои треба да ги носат и дека истите тие одлуки не секогаш ќе бидат прифатени од останатите, но тоа е одлика на вистинските лидери.

Учесниците, предавачите и гостите во текот на Школата, освен што ќе уживаат во преубавиот амбиент на долгогодишниот поддржувач и партнер на Школата – Хотелот „Инекс Олгица“ и ќе имаат можност да ги видат убавините на Охрид.

Темата на овогодинешната Школа за млади лидери е „Едукација – трансформација – лидерство“ и на истата учествуваат четириесетина УЧЕСНИЦИ од различни земји од светот, од Македонија, Србија, САД, Азербејџан, Турција, Јемен, Алжир, Нигерија, Германија, Филипини и Канада, кои своите знаења, вештини и амбиции за лидерство ќе ги градат и развиваат со повеќе од дваесет меѓународно признати професори, експерти од различни области, актуелни и поранешни политичари.

Меѓу ПРЕДАВАЧИТЕ оваа година на Школата за млади лидери се:

– Златко Лагумџија, поранешен Премиер на БиХ, актуелен Амбасадор на Босна и Херцеговина во ОН;

– д-р Исмаил Сарагелдин, поранешен директoр на Александриската библиотека и потпретседател на Светска банка;

– проф. д-р Колин Снajдер, професор по историја на Латинска Америка на Универзитетот Тексас – Тајлер;

– проф. д-р Томас Гудерјан, професор по антропологија на Универзитетот Тексас – Тајлер во САД;

– Мајк Коб, експерт за организирање на процесот на едукација во Саудиска Арабија;

– Марк Донфрид, директор на Институтот за културна дипломатија во Берлин;

– проф. д-р Роберт Стеркен, професор по политички науки во Универзитетот Тексас-Тајлер во САД;

– проф. д-р Анис Сефиданис, професор информатички науки и роботика на Универзитетот „Св. Апостол Павле“ во Охрид;

– проф. д-р Невенка Димитрова, лидер во истражување на податоци од областа на биомедицината;

– проф. д-р Александра Креглер, асистент професор на одделот за Социологија на Универзитетот Тексас – Тајлер во САД;

– проф. Никола Илиќ – основач и директор на ChangeLab Global, професор на Универзитетот Џорџтаун во Вашингтон;

– проф. д-р Атанас Кирјаковски – асистент професор по Психологија на Меѓунатодниот Балкански Универзитет во Скопје;

– амб. Ивица Боцевски, поранешен вице премиер за Европска Интеграција и поранешен амбасадор во Бразил;

– Зоран Костовски и Ранко Безар од МОТИВА;

– Виктор Мизо, генерален менаџер на Костал Груп и Костал Македонија;

– д-р Игор Радев од МАНУ;

– проф. д-р Али Фети Окјар, професор на Универзитетот Једитепе во Истанбул;

– проф. д-р Илким Буке Окјар, професор на Универзитетот Једитепе во Истанбул;

– Мехмет Бајрак, Координатор на Канцеларијата на ТИКА во Скопје;

– проф. д-р Енис Реџеп, професор  на Европскиот универзитет во Скопје;

– д-р Рашела Мизрахи, пратеничка во македонското Собрание;

– д-р Александар Митов, експерт по јавно здравје; и

– проф. д-р Гордана Силјановска – Давкова, професор на Правниот факултет „Јустинијан Први“ во Скопје, пратеничка во Собранието на Република Македонија и кандидат за претседател во 2019 година.

14-та Школа за млади лидери на Претседателот Иванов континуирано ја потврдува својата заложба за создавање на нови генерации млади лидери во областите од кои доаѓаат, притоа овозможувајќи им преку предавањата кои ќе ги слушаат и контактите кои ќе ги создадат, понатаму да се развиваат и на личен и на професионален план.

Спонзори и ПОДДРЖУВАЧИ на Школата за млади лидери се Канцеларијата на ТИКА – Агенција за соработка и координација на Турција во Скопје, Хотелот Инекс Олгица Охрид, ТАВ Македонија, Халкбанк, Туркиш Ерлајнс, Делфино, Витаминка, Алкалоид, Петрол Оил, А1 Македонија, Скопска пивара, DMS, Комфи Ејнџел, Мотива.